दमक ।  झापा दमकस्थित सबैभन्दा पुरानो निजी अस्पताल लाइफलाइन अस्पतालले आइसियु तथा भेन्टिलेटर सहितको ३० बेड क्षमताको कोभिड वार्ड सञ्चालन सुरु गरेको । आइतबार अनौपचारिक कार्यक्रमबिच दमक नगरका नगर प्रमुख रोमनाथ ओलीले कोभिड वार्डको उद्घाटन गरेका छन् । उनले प्रदेश तथा सङ्घीय सरकारसँग समन्वय गरेर आवश्यक सहयोग जुटाउन प्रयत्न गरिने पनि बताए ।

कोभिड वार्डका लागि अस्पतालले हाल इमरजेन्सी सहित एचडियु सेवा प्रदान गर्ने गरेको अस्पतालको ४ तले ब्लक कोभिड वार्डको रुपमा सञ्चालनमा ल्याएको हो । अस्पतालका मेडिकल डाइरेक्टर डा. सुर्यनारायण शाहका अनुसार विशेषज्ञ सेवा सहित कोभिडका बिरामीहरूले यहाँ सहज रुपमा सेवा पाउनेछन् ।

विपतको यो समयमा अस्पतालको तर्फबाट पनि कोभिडका बिरामीलाई उपचार गराउनका लागि अस्पतालका सञ्चालकहरू तथा स्वास्थ्यकर्मीहरुले देखाएको तदारुकताले यो सम्भव भएको पनि डा. शाहले जनाएका छन् ।

अस्पतालका अध्यक्ष डा. मुक्तिनाथ भट्टराईका अनुसार बेड क्षमता अनुसार कसैलाई विभेद नगरी अस्पतालमा कोभिडका बिरामीहरूलाई भर्ना लिइनेछ । यो विषम अवस्थामा यस क्षेत्रका कोभिडका बिरामीहरूलाई  सेवा दिएर ज्यान बचाउन सकिए हुन्थ्यो भन्ने लागेर हामीले उपचार केन्द्रको रुपमा नै कोभिड वार्ड सुरु गरेका हौ, भट्टराईले भने ।