झापा । मोरङको सुन्दरहरैचा नगरपालिका- १० बिराटचोकमा सञ्चालित नेती फर्मा र डे– ड्रिम मेडिसिन सेन्टरका सञ्चालकलाई ठुलो परिणामको अवैध औषधि सहित प्रहरीले पक्राउ गरेको छ । सञ्चालकलाई पक्राउ गरेसँगै उक्त औषधि खरिद गरी लागु औषधको रुपमा प्रयोग गर्ने अन्य ७ जना समेत पक्राउ परेका छन् ।

दुवै मेडिकलबाट चिकित्सकको अनुमति बिना अवैध रुपमा महँगो मूल्यमा लागु औषध दुर्व्यसनीमा लागेका व्यक्तिहरूलाई औषधि अनधिकृत रुपमा बिक्री वितरण भइरहेको  विशेष सूचनाका आधारमा १ नम्बर प्रदेश प्रहरी कार्यालय विराटनगरको आरआइटी समूह र इलाका प्रहरी कार्यालय बेलबारीबाट खटिएको प्रहरी टोलीले उनीहरूलाई पक्राउ गरेको हो ।

पक्राउ पर्नेहरूमा मेडिकल सञ्चालक सुन्दरहरैचा नगरपालिका- १० का ४५ वर्षीय सुशील काफ्ले र उनका श्रीमती ३२ बर्षीया गोमा कार्की र लागु औषध सेवनकर्ताहरू सुन्दरहरैचा- १ का २३ वर्षीय सनम खवास, सुन्दरहरैचा- १० का ३० वर्षीय अरुण राई, ३५ वर्षीय सनम तामाङ , सुन्दरहरैचा- ९ का २४ वर्षीय सुवास राई, २२ वर्षीय जुसन सुनाम, ३१ वर्षीय निमेष परियार र ३४ वर्षीय अनुप खड्का रहेका छन् । मेडिकलबाट प्रहरीले SPASPAIAN- 44,370 चक्की, ANTI KOF- 17,620 चक्की, NEAURIN-75- 18,923 चक्की, PRE-Z-75- 1,200 चक्की र APABALIN-75-14,600 चक्की बरामद गरेको छ । यता घटनाको बारेमा प्रहरीले थप अनुसन्धान अघि बढाएको इलाका प्रहरी कार्यालय बेलवारीले जनाएको छ ।