जनता समाजवादी पार्टी (जसपा) का १ नम्बर प्रदेश सदस्य विजयकुमार केरुङ कुनै पनि पदमा रहने नगरी पार्टीबाट अलग हुने निर्णय लिएको छ । २०७० सालमा जसपा लागेका साबिक पृथ्वीनगर गाविस- ५ हाल भद्रपुर नगरपालिका- २ सगरमाथा चोक निवासी विजयकुमार केरुङले आफ्नै घरायसी र व्यवसायीक व्यस्तताको कारण देखाउँदै पार्टीबाट अलग भई स्वतन्त्र बस्ने निर्णय लिएको विज्ञप्तिमा उल्लेख छ । उनी जसपामा सक्रिय कार्यकर्ताको रुपमा आबद्ध भई झापा क्षेत्र नम्बर ३ को क्षेत्रीय संयोजक हुँदै प्रदेश सदस्य पद रहेर काम गर्दै आइरहेका थिए । उनी दक्षिणकाली इँटा उद्योग (डिबीआई) र केरुङ निर्माण सेवा प्रा. लि.का सञ्चालक हुन् । 

यस्तो छ विज्ञप्ति

साबिक पृथ्वीनगर गाविस- ५ हाल भद्रपुर नगरपालिका- २ सगरमाथा चोक निवासी (म) विजयकुमार केरुङ जनता समाजवादी पार्टी (जसपा)बाट अलग भई स्वतन्त्र बस्ने निर्णय लिएको छु ।

वि.सं. २०७० सालमा जसपामा सक्रिय कार्यकर्ताको रुपमा आबद्ध भई पार्टीले झापा क्षेत्र नम्बर- ३ को क्षेत्रीय संयोजक हुँदै प्रदेश नम्बर १ को प्रदेश सदस्य जस्तो गरिमामय पदमा रहेर जिम्मेवारीपूर्वक काम गर्ने अवसर प्रदान गरेको थियो ।

पार्टीकै तर्फबाट २०७० सालको दोस्रो संविधानसभा निर्वाचनमा झापा क्षेत्र नम्बर- ३ बाट उम्मेदवारी दिएको अवगत गराउँदै पछिल्लो समयमा आफ्नै घरायशी र व्यवसायीक व्यस्तताका कारण पार्टीमा समय दिन नसकिरहेकोले आजकै मितिदेखि पार्टीबाट अलग भई स्वतन्त्र नागरिक भएर बस्ने यसै विज्ञप्तिमार्फत जानकारी गराउन चाहन्छु ।

विगत ८ वर्षको लामो अन्तरालमा जसपामा रहँदा पार्टीका साथी, सहयोगी, शुभचिन्तकबाट प्राप्त सहयोग, सद्भाव र स्नेहप्रति हृदयदेखि आभारी छु ।

पार्टीमा रहेका बेला कार्यकर्तादेखि नेतासम्मले मप्रति देखाएको जिम्मेवारी र सद्भाव कहिले भुल्ने छुइन । अबको मेरो यात्रा व्यावसायिक र सामाजिक कार्यमा अग्रसर रहने सबैमा जानकारी गराउँदछु । मिति २०७८-१२-२३