सरकारले तोकेको धानको समर्थन मुल्य कार्यान्वयनको माग गर्दै किसानले बिर्तामोडस्थित खाद्य व्यवस्था तथा कम्पनी लिमिटेडको शाखा कार्यालयमा तालाबन्दी गरेका छन् । प्रहरीको हस्तक्षेपका बिच किसानहरूले तालाबन्दी गरेका हुन् ।

सरकारले तोकेको मूल्यमा धान खरिद नभइरहेको भन्दै उनीहरूले तत्काल समर्थन मूल्यमा धान खरिद गर्नुपर्ने माग गरेका हुन् । अखिल नेपाल किसान महासंघ झापा र नेपाल किसान महासङ्घले संयुक्त रुपका तालाबन्दी गरेको छन् ।

अखिल नेपाल किसान महासंघका राष्ट्रिय समिति उपाध्यक्ष वेणु सिवाकोटीले व्यापारीले मनपरी मूल्यमा किसानबाट धान खरिद गरिरहेको जानकारी दिए । किसानको दबाबका कारण सरकारले मुल्य निर्धारण गरेको छ, सिवाकोटीले भने – अहिले खाद्यले धान खरिद गरेको छैन, व्यापारीले तोकिएको मुल्य दिइरहेका छैनन् ।

सरकारले मोटा धान प्रति मन ११८६ र मध्यम धान १२५१ रुपैयाँ तोकेको छ । व्यापारीहरूले आफूखुसी ९ सय देखि १ हजारसम्म प्रतिमनमा धान खरिद गरिरहेका छन् । जिल्लाभरबाट प्रतिनिधिमूलक सहभागी भएका किसानलाई प्रहरीले तालाबन्दी गर्न रोकेको थियो ।