भारतको उत्तरपूर्वी राज्य त्रिपुरामा भगवान् जगन्नाथको ’उल्टा रथ यात्रा’ निकाल्ने क्रममा फलामे बनेको रथ ओभरहेड हाई टेन्सन तारसँग छुँदा कम्तीमा ७ जनाको मृत्यु भएको छ भने अन्य १५ जना घाइते भएका छन् । 

घटना त्रिपुराको राजधानी शहर अगरतलाबाट १२० किलोमिटर उत्तरपूर्वमा उनाकोटी जिल्लाको कुमारघाट क्षेत्रमा भएको हो । भारतीय प्रहरीका अनुसार भगवान् जगन्नाथको ’उल्टा रथ यात्रा’ भक्तजनहरूले तानेका बेला सो दुर्घटना भएको हो । रथको माथिल्लो भाग १३३ केभी हाई टेन्सन तारसँग छुँदा सो दुर्घटना भएको हो ।

दुर्घटनामा परी दुई बालबालिकासहित ७ जनाको मृत्यु भएको जनाइएको छ । घाइतेहरूलाई सरकारी अस्पतालमा भर्ना गरिएको छ । प्रहरीले दुर्घटनाको विषयमा मुद्दा दर्ता गरी अनुसन्धान सुरु गरेको जनाएको छ । मृतकहरूको परिवारजनलाई राज्य तथा केन्द्रीय सरकारले क्षतिपूर्ति दिने घोषणा गरेको छ ।