बिर्तामोड। नेपाल कम्युनिस्ट पार्टी (विप्लव) का स्थायी कमिटी सदस्य अनिल विरही ‘सी’ ले कोशी प्रदेशमा पहिचानका नाममा भइरहेको आन्दोलनप्रति सरकार गम्भीर हुनु पर्ने बताएका छन् ।
बिहीबार (आज) बिर्तामोडमा आयोजित संवाद कार्यक्रममा बोल्दै विरहीले सरकारले दमन गरेर पहिचानको आवाज दबाउन नसक्ने बताए । पहिचानको पक्षमा उठेको आवाजलाई कमजोर नठान्न सुझाउँदै विरहीले समस्या समाधानका लागि जनमत सङ्ग्रह गर्नुपर्नेमा जोड दिए । ‘दमन गरेर हुन्न, जनमत सङ्ग्रहबाट फैसला गरौँ’ विरहीले भने ‘जनमतको सबैले कदर गर्नुको विकल्प छैन ।’

अर्को प्रसङ्गमा उनले सङ्घीयता मात्र समाधान नभएको भन्दै समाजवादी सङ्घीयताको आवश्यकता औँल्याए । मुलुकमा यही अवस्था रहे राजतन्त्र र हिन्दु राज्य फर्कने विरहीले दाबी गरे । अमेरिकासहितका शक्ति राष्ट्रको चलखेलले नेपालको सङ्घीयता संकटोन्मुख रहेको भन्दै उनले भने ‘यही अवस्था रहे राजतन्त्र फर्कँदैन भन्न सकिन्न ।’ विरहीले नेपाली विशेषताको वैज्ञानिक समाजवादको विकल्प नरहेको बताए ।

पार्टीका केन्द्रीय सदस्य तथा मेची इन्चार्ज सुमन सिंह पौड्यालले कोशी प्रदेशमा शान्ति खलबल्याउन विभिन्न प्रयत्न भइरहेको बताए । पौडेलले पहिचानको आन्दोलन दबाउने प्रयास, धर्मका नाममा उठेका विषय, राजतन्त्र पक्षधरको गतिविधि, एमसीसीको प्रभावले प्रदेशलाई अशान्त बनाउने प्रयास भएको बताए । उनले चीनलाई दबाबमा राख्ने रणनीतिमा अमेरिका, भारतलगायतका राष्ट्र अघि बढेको दाबी गरे ।
कार्यक्रममा पार्टीका केन्द्रीय सदस्य प्रशान्त, पाँचथर इन्चार्ज सन्तोष, विनोद, भरत, सौगात, डा. डिल्लीराज रिजाल लगायतका नेताको सहभागिता थियो । मुलुकको वर्तमान परिस्थिति र निकासको बाटो विषयमा भएको छलफलको संयोजन संवाद समूह झापाले गरेको थियो ।