फागुन २१ को आम निर्वाचनमा क्लीन स्वीप गरेको राष्ट्रिय स्वतन्त्र पार्टीले झापामा झन्डै अढाई लाख समानुपातिक मत ल्याएको छ ।

जिल्लाका पाँच वटा निर्वाचन क्षेत्रबाट रास्वपाले २ लाख ४८ हजार १३८ समानुपातिक मत ल्याएको हो । त्यसपछि नेकपा एमालेले ५५ हजार २५१ मत ल्याउँदा श्रम संस्कृति पार्टी तेस्रो बनेको छ । श्रम संस्कृति पार्टीले ४५ हजार ३२५ मत ल्याएको हो ।

देशभरि समानुपातिक मतमा दोस्रो रहेको नेपाली काँग्रेस झापामा भने चौथो भएको छ । कांग्रेसले ३८ हजार १७० मत ल्याउँदा पाँचौँ स्थानमा रहेको नेपाली कम्युनिस्ट पार्टीले ७ हजार ९९८ मत पाएको छ । त्यसपछि मंगोल नेशनल अर्गनाइजेशनले २ हजार ३६२ , राष्ट्रिय परिवर्तन पार्टीले २ हजार ३३८ , जनमत पार्टीले १ हजार १०६ मत ल्याएका छन् ।

देशभरि रास्वपाले ५० लाख मत कटाएको छ । ५० लाख १६ हजार ६८ मतसहित रास्वपा पहिलो बन्दा दोस्रो स्थानमा रहेको कांग्रेसले १६ लाख १६ हजार १५० , एमालेले १४ लाख १३ हजार ३१२ , नेकपाले ७ लाख ६९ हजार ४९० , श्रम संस्कृति पार्टीले ३ लाख ५८ हजार ४९५ , राप्रपाले ३ लाख २५ हजार ४४४ मत ल्याएको निर्वाचन आयोगले जनाएको छ ।