झापा । नेपाल–भारतको सीमा नाकाबाट आउजाउ गर्ने जोकोही अहिले झापाको भद्रपुर नाकामा केही समयका लागि भए पनि रोकिन बाध्य भएका छन्। तर, उनीहरूलाई सीमा तैनाथ सुरक्षाकर्मीले चेकजाँचका लागि भने रोकेका होइनन् । 

सुरक्षाकर्मीहरूको चेकजाँचको प्रक्रिया भने छुट्टै छ । उनीहरू सुन्दर दृश्य अवलोकन गर्न आफूखुशी रोकिएका हुन् । यसको मुख्य कारण हो–भद्रपुर गलगलिया सीमा नाकामा हालै निर्माण गरिएको सौन्दर्यीकरण । अन्तर्राष्ट्रिय सीमा प्रवेशद्वारमै अहिले अधिकांश आगन्तुक आफै रोकिने र मोबाइल निकालेर फोटो तथा सेल्फी खिच्न व्यस्त हुने गरेका छन् ।

सामाजिक अभियन्ता सञ्जय भुइँमाली र भावना क्षेत्री भुइँमालीको पहलमा सीमा क्षेत्रमा आकर्षक संरचना निर्माण गरिएको छ । अङ्ग्रेजी अक्षरमा ‘नेपाल’ लेखिएको आकृति, त्यससँगै राष्ट्रिय झण्डा, भगवान् बुद्धको शालिक र विभिन्न पर्यटकीय क्षेत्र समेटिएको होर्डिङ बोर्डले सीमा नाकालाई थप आकर्षक बनाएको छ । रात्रिकालीनका लागि ‘नेपाल’ लेखिएको आकृतिमा बिजुलीबत्ति पनि जडान गरिएको छ ।  

सीमा प्रवेशमै देखिने यस्तो दृश्यले स्वदेशी मात्र नभई विदेशी पर्यटकको मन पनि लोभ्याएको छ । नेपाल प्रवेशको पहिलो बिन्दुमै सकारात्मक सन्देश दिने उद्देश्यले निर्माण गरिएको उक्त संरचनाले भद्रपुरको सीमा क्षेत्रलाई नयाँ पहिचान दिएको स्थानीयहरू बताउँछन् । 

भद्रपुर नगरपालिकाले प्रवेशद्वारमै सडक किनारको जमिन उपलब्ध गराएपछि भुइँमाली दम्पतीले  विभिन्न दाताको सहयोग र आफ्नै श्रम र पुजी खर्चिएर उक्त स्थानको सौन्दर्यीकरण गरेका हुन्। गत माघ १० गतेदेखि सुरु गरिएको संरचना निर्माण कार्य अन्तिम चरणमा पुगेको छ । करिब १६ फिट चौडाइ र साढे ३ फिट उचाइको पक्की संरचनामा ‘नेपाल’ लेखिएको आकृति निर्माण गरिएको सामाजिक अभियन्ता सञ्जय भुइँमालीले जानकारी दिए ।

साथै साढे तीन फिट उँचाइको शान्तिको प्रतीक भगवान् बुद्धको शालिक, पर्यटकीय क्षेत्रहरू भएको होर्डिङ बोर्ड, बिरुवा रोप्नुका साथै राष्ट्रिय झण्डा फहराइएको अभियन्ता भुइमालीले बताए । ‘वडा प्रहरी कार्यालय भद्रपुरका प्रहरी निरीक्षक मोतीलाल योञ्जन तामाङले सीमा नाकामा देशको पहिचान झल्किने खालको एउटा संरचना बनाऊ भएर मसँग प्रस्ताव राख्नु भयो । उहाँको प्रस्तावप्रति एकै पटकमा समर्थन जनाउँदै त्यहाँ जमिन उपलब्ध गराइ दिनु हुन अनुरोध गर्‍यौं’, भुइँमालीले भने । 

त्यसपछि उनले सम्बन्धित निकायसँग सहकार्य गरी जमिन उपलब्ध गराइ दिएको बताउँदै उनले भने, ‘त्यसपछि हामीले यो संरचना निर्माण सुरु गरेका हौँ ।’ संरचना निर्माण गर्दा विभिन्न दाताहरुको पनि सहयोग रहेको छ । यो निर्माण कार्यमा आफै लागि परेर श्रमदान पनि गरेको उनले बताए । नेपाल लेखिएको यस्तो संरचना भारत र चीनसँग जोडिएको देशको हरेक नाकामा हुनु पर्नेछ । यसले देशको पर्यटन प्रवर्द्धनमा टेवा पुर्‍याउने उनको भनाई छ। उक्त संरचनाको औपचारिक उद्घाटन यही २०८३ सालको नयाँ वर्ष,  बैशाख १ गतेको दिन गरिने जनाइएको छ ।