झापा । नेकपा एमालेका अध्यक्ष केपी शर्मा ओलीले धरतीमा पहिलो पटक नेपालले परमादेशबाट सरकार पाएको बताएका छन् । यसअघि धरतीमा कतै पनि परमादेशबाट सरकार नबनेको ओलीको दाबी छ ।

बिर्तामोडमा ओलीले बडादसैँ, शुभ दीपावली र छठ पर्वको अवसरमा आयोजना गरेको शुभकामना आदानप्रदान कार्यक्रमलाई सम्बोधन गर्दै यस प्रकारका गलत क्रियाकलाप नगर्न सबैलाई विजयादशमीले सद्बुद्धि दियोस् भन्ने कामना गरेका छन् ।

जनताको म्याण्डेड पाएको नेकपा एमालेलाई परमादेशबाट हटाएर समृद्धिको यात्रालाई रोक्ने प्रयास भएको ओलीको आरोप छ । उनले भने, ‘१० वर्ष अघिसम्म देश बन्दैन कि भन्ने थियो । अहिले देश बनाउन सकिन रहेछ भन्ने बनाएको छु ।’ देश बनाउन सकिन्छ, तर गलत स्वार्थ भएकाहरूबाट सबै सचेत भएर खबरदारी गर्नुपर्छ, ओलीले थपे ।

अध्यक्ष ओलीले शुभकामना कार्यक्रममा शुभकामना मात्रै राख्ने भन्दै अन्य दलको टीकाटिप्पणी गर्न चाहेनन् । उनले बडादसैँले सबैलाई सकारात्मक बन्न शक्ति प्रदान गरोस् भन्दै शुभकामना व्यक्त गरे ।

शुभकामना कार्यक्रममा बोल्दै उनले जनताको जीवनमा सकारात्मक परिवर्तन ल्याउन नै लोकतन्त्र ल्याएको धारणा राखे । ओलीले मुलुकमा लोकतन्त्रका नाममा लुटतन्त्र मच्चाएको भन्दै लोकतन्त्र, विधि पद्धतिलाई ख्याल गर्न आग्रह गरेका छन् । उनले परमादेशबाट बहुमत प्राप्त सरकार हटाएको स्मरण गर्दै सट्टापट्टाको खेलले मुलुक धरापमा पर्ने खतरा बढेको बताए । परमादेशबाट बनेको सरकारले ३ महिनासम्म सरकार समेत बनाउन नसकेको, बनाउँदा पनि ‘जेठान’सँग सट्टापट्टा गरेको सुनाए । अदालतले परमादेशको बदलामा सट्टापट्टा गरेको आरोप लगाए ।

पूर्व प्रधानमन्त्री समेत रहेका ओलीले वर्तमान सरकार, गरिब विपन्न, भूमिहीन, सुकुम्वासी विरुद्ध अघि बढेकोले यसले विद्रोह जन्माउने बताए । उनले एमालेका नेता कार्यकर्तालाई भ्रम र कु प्रचारको विरुद्ध लड्न निर्देशन दिएका छन् । निर्वाचनका लागि समेत तयारी अवस्थामा रहन ओलीले सङ्केत गरेका छन् ।