बिर्तामोड घर भएकी एक महिलालाई सासूले उपचार नगराई घरबाट निकाल्दा मृत्यु भएको भन्दै माइती पक्षले कारबाहीको मागसहित प्रहरीमा उजुरी दिएका छन् । घरबाट निकालिएकी बिर्तामोड नगरपालिका–३ बस्ने सुमित बिककी श्रीमती २४ वर्षीया सरिता बिकको आज माइती घर सुनसरीको रामधुनी नगरपालिका–७ कुमारखतमा मृत्यु भएको हो ।

सरितालाई उनको सासू राधिका गजमेरले तीन दिनअघि घरबाट निकाली माइत पुर्याउन आएकी थिइन् । सरिता रिँगटा लाग्ने ,टाउको दुख्ने बिरामी भई उपचारको लागि उनको सासू राधिकाले विर्तासिटी अस्पताल बिर्तामोडमा लगेर चेकजाँच गराउँदा अवैध सम्बन्धबाट डेढ महिनाको गर्भवती देखिएको थियो ।

त्यसपछि सासूले उनलाई घरबाट निकालेर माइत पुर्‍याएकी थिइन् । सरिताका श्रीमान् विगत दुई वर्षदेखि दुबईमा रहेका छन् । सरिताको मृत्युपछि माइती पक्षले अनुसन्धान र कारबाहीको माग गर्दै उजुरी दिएको इलाका प्रहरी कार्यालय पकलीका प्रहरी निरीक्षक लेखनाथ दाहालले बताए । उनले कानुनी प्रक्रिया पुरा गरी मृतकको शवलाई पोस्टमार्टमको लागि बिपी कोइराला स्वास्थ्य विज्ञान प्रतिष्ठान धरान पठाइएको जानकारी दिएका छन् ।

सरिताको मृत्यु हुनु एक दिन अगावै माइती पक्षले हिजो इलाका प्रहरी कार्यालय बिर्तामोडमा उजुरी दिएका थिए । माइती पक्षले हिजो ठाडो निवेदन दिएको इलाका प्रहरी कार्यालय बिर्तामोडका डीएसपी विजय श्रेष्ठले जानकारी दिए । मृतकको पोस्टमार्टम रिपोर्ट आएपछि कानुनी कारबाही अघि बढाइने उनको भनाई छ ।