व्यक्तिगत पुरानो रिसिबीका कारण तरुण दलका कार्यकर्ताहरूले ताप्लेजुङको आठराईत्रिवेणी–२ का वडाध्यक्ष टेकेन्द्र सेन्दाङमाथि सांघातिक आक्रमण गरेको घटना खुलेको छ ।

नेकपा एमाले जिल्ला कमिटी सदस्यसमेत रहेका ४२ वर्षीय सेन्दाङलाई शनिबार साँझ ६:२० बजे फुङलिङ –४ तोक्मेडाँडामा फुङलिङ बस्ने वर्ष १६–१८ का मिथुन पालुङवा लिम्बू, मन्दीप लिम्बू, हेम आङबुहाङ, विशाल तामाङ लगायत १०–१२ जनाको युवाहरूको समूहले सांघातिक आक्रमण  गरेका थिए । हाल उनीहरू सबै फरार छन् ।

आज बिहान ६:५५ बजे घाइते वडाध्यक्ष सेन्दाङलाई बीएण्डसी अस्पताल बिर्तामोडमा ल्याई भर्ना गरिएको छ । उनको टाउकोको पछाडिको भागमा चोट लागेको छ भने घाँटी र घुँडा सामान्य पिल्सिएको छ । वडाध्यक्ष सेन्दाङ पूर्व प्रहरी कर्मचारी पनि हुन् । 

गत २०७९ सालमा सम्पन्न स्थानीय तहको निर्वाचनमा वडाध्यक्ष टेकेन्द्र सेन्दाङको समूहले चुनावी प्रचारप्रसारको दौरानमा मन्दीप लिम्बूलाई कुटपिट गरेका थिए । सोही पुरानो रिसिबीका कारण सेन्दाङमाथि मन्दीपलगायतले आक्रमण गरेको बताइएको छ । ती युवाहरू कोशी प्रदेशका उद्योग, कृषि तथा सहकारी मन्त्री खगेनसिंह हाङगाम निकट हुन् । उनीहरू नेपाली काँग्रेसको भ्रातृ संगठन तरुण दल आबद्ध रहेको बुझिएको छ ।