स्थानीय तह निर्वाचनको परिणाम आएसँगै झापामा जनप्रतिनिधिहरूले पद सम्हाल्ने क्रम जारी छ। बुद्धशान्तिमा सोमबार सम्पन्न शपथ ग्रहण समारोह लगत्तै वडा नम्बर १ का वडाध्यक्ष अनिल वाग्लेले आफ्नो पदभार सम्हालेका छन्। वडा सचिव हरि प्रधानले वाग्ले र अन्य निर्वाचित प्रतिनिधिलाई स्वागत गरेका थिए। सो क्रममा शुभेच्छुकहरूको बाक्लो उपस्थिति थियो ।

नवनिर्वाचित अध्यक्ष वाग्लेले वडामा परेको एक निवेदनमा तोक लगाउँदै काम सुचारु भएको घोषणा गरेका थिए। वडामा रहेका अपाङ्गता भएका नागरिक र अति विपन्न परिवारलाई छनौटका आधारमा स्वास्थ्य बिमा गर्ने गरी उनले निवेदनमा हस्ताक्षर गरेका हुन्।

उनले निर्वाचित प्रतिनिधि र कर्मचारीबिच समन्वय गरेर अघि बढ्ने बताए। वाग्लेसँगै सदस्यहरूमा तुलसा खतिवडा रेग्मी, लक्ष्मी कँडेल, मोहनकुमार राई, सुमित्रा रसाइलीले पनि कार्यभार जिम्मा लिएका छन्।