मेचीनगर । झापा क्षेत्र नम्बर १ का प्रतिनिधि सभाका उम्मेदवार विश्वप्रकाश शर्माले गठबन्धनको पक्षमा देशभर जनलहर बढिरहेको बताएका छन् । शनिवार मेचीनगर तथा बुद्धशान्तिका विभिन्न वडामा मतदाता भेटघाटमा शर्माले आफूहरू जितको नजिक पुगेको बताएका हुन् । 

मेचीनगर ८ स्थित पालिया गङ्गा टोलमा आयोजित घरदैलो कार्यक्रम पछि पत्रकारसँग संक्षिप्त कुराकानी गर्दै शर्माले निर्वाचनमा प्रतिस्पर्धा हुनु स्वाभाविक र सामान्य रुपमा लिएको तर निर्वाचनलाई रेस्लिङको रुपमा नभएर गठबन्धनले उत्सवको रुपमा लिएको बताए । ‘सुसंस्कारित व्यवहार गर्नु पर्छ । हामी मञ्चबाट नकारात्मक कुरा गर्दैनौँ’ शर्माले भने, ‘एमालेले पनि सकारात्मक सोचको विकास गर्न सकोस् ।’ 

शर्माले यस क्षेत्रलाई संस्कारित क्षेत्रको रुपमा विकास गर्नु पर्ने बताए । उनले भने, ‘मैले निर्वाचन हार्दा विजेतालाई फूलको माला लगाएँ र बधाई दिए, विष्णु प्रसाईँले मेयरमा हार्दा पनि विमल आचार्यलाई फूलको माला लगाई दिएँ । शर्माले भने, यो क्षेत्र जित्दा पनि मुस्कुराउने  र हार्दा पनि मुस्कुराउने क्षेत्र हो । उनले प्रतिस्पर्धी  मित्रलाई चुनावको बेला अँध्यारो अनुहार नलगाउन र धारेहात नगर्न सुझाए ।   

शर्मा अभियानमा गाउँ(गाउँ पुग्दा मतदाता ज्येष्ठ नागरिदेखि युवाहरूले जितको लागि शुभकामना दिँदै फूलको माला र अबिरको टिका लगाई हौसला प्रदान गरेका छन् । 

‘हामी यस पटक निर्वाचन भारी मतका साथ जित्दैछौं’ शर्माले मतदातालाई विश्वस्त पार्दै भने, ‘हामी अर्जुन दृष्टि अभियानका साथ अघि बढेका छौँ यस पटक कसैले रोक्न सक्दैन ।’ शर्माले एमाले सहित सबै दलले गठबन्धनलाई सहयोग गर्ने विश्वास व्यक्त गरे । प्रदेश ९क० मा शर्मा र गोपाल तामाङ र प्रदेश ९ख०मा उम्मेदवार श्यामवीर लिम्बूले घरदैलो गरेका छन् । 

प्रचार टोलीले मेचीनगर-७, ८, ९, ३, र बुद्धशान्ति-४ का विभिन्न टोलमा घरदैलो गरेको छ ।  अभियानमा काँग्रेस झापाका जिल्ला कार्यवाहक सभापति केशवराज पाण्डे, मणि कुमार उप्रेती, नगर सभापति सुदय पनेरु, माओवादी केन्द्रका नेता प्रकाश भण्डारी लगायतको सहभागिता रहेको थियो ।