बलात्कार गरेको आरोपमा मोरङको सुनवर्षी नगरपालिका-४ बाट प्रहरीले १ जना पुरुषलाई पक्राउ गरेको छ। डर त्रास देखाएर आफ्नै घरमा बलात्कार गरेको भनेर किटानी जाहेरी परेपछि सुनवर्षी-४ का ५८ वर्षीय पुरुषलाई पक्राउ गरिएको प्रहरीले जनाएको छ। पुरुषमाथि झण्डै १ वर्षअघि २५ वर्षीया बुहारीलाई बलात्कार गरेको आरोप छ । 
ससुराले २०७८ साल फागुन १० गते बलात्कार गरेको भनेर बुहारीले इलाका प्रहरी कार्यालय रंगेलीमा मंगलबार जाहेरी दिएकी हुन्। बुहारीमाथि बलात्कार गरेको आरोप लागेका पुरुषलाई प्रहरी चौकी अमरदहबाट खटिएको टोलीले घरैबाट पक्राउ गरेको हो । 

उनीविरुद्ध जबरजस्ती करणी मुद्दा चलाउन बुधबार अदालतबाट म्याद थप गरेर अनुसन्धानको बाँकी प्रक्रिया अघि बढाइएको मोरङ प्रहरीका डीएसपी टीकाबहादुर कार्कीले जानकारी दिए । उनका अनुसार पीडितको स्वास्थ्य परीक्षण विराटनगरमा गराइएको छ ।