झापामा चोरी मुद्दाका दुई फरार प्रतिवादी पक्राउ परेका छन् । पक्राउ पर्नेहरूमा गौरादह नगरपालिका– ८ बस्ने विजय भन्ने रोबिन राजवंशी र सोही नगरपालिका– २ बस्ने एलेक्स भन्ने विजय चौधरी रहेको जिल्ला प्रहरी कार्यालय झापाले जनाएको छ । 
प्रहरीका अनुसार झापा जिल्ला अदालतको मिति २०७८ कार्तिक १४ गतेको फैसला अनुसार चोरी मुद्दामा विजयलाई ६ महिना कैद र रु ५ हजार जरिवाना सजाय सुनाइएको थियो । 
अदालतले सोही दिनको फैसलामा एउटै घटनामा संलग्न एलेक्सलाई १ वर्ष ६ महिना कैद र रु १५ हजार जरिवाना सजाय सुनाइएको थियो ।फरार रहेका राजवंशी र चौधरीलाई जिल्ला प्रहरी कार्यालय झापाबाट खटिएको प्रहरी टोलीले बिहीबार पक्राउ गरेको हो । 
पक्राउ परेका दुवै जनालाई झापा जिल्ला अदालतमा उपस्थित गराइ अदालतको आदेश अनुसार कैद भुक्तानका लागि झापा कारागार भद्रपुर चलान गरिसकेको प्रहरीले जनाएको छ ।