ह्विलचियर  बिग्रेका कारण झापा हल्दिवारीका १७ वर्षीय अमित महतोलाई विद्यालय जान समस्या भइरहेको थियो ।  जन्मजात अपाङ्गता  भएका महतो घरबाट  करिब एक किलोमिटर ह्विलचियरको सहयोगबाटै विद्यालय जाने गरेका छन् ।  रोटरी क्लब अफ डिल्लीबजार काठमाडौँको सहयोगमा रोटरी क्लब अफ बिर्तामोडले  निःशुल्क ह्विलचियर वितरण गरेपछि  अमित हर्षित  देखिए । रोटरी क्लब अफ डिल्लीबजार काठमाडौँ र  रोटरी क्लब अफ बिर्तामोडबीच भगिनी सम्बन्ध रहेको छ । 

अमित घरबाट आफै ह्विलचियर लिन  हल्दिवारी गाउँपालिका कार्यालयसम्म आफै आइपुगे । ह्विलचियर  पाएपछि खुशी हुँदै  अमितले भने ,‘ ह्विलचियर  बिग्रेपछि समस्या थियो अब  रहेन ।’ भविष्यमा आइटी पढेर   कम्प्युटरसम्बन्धी काम गर्ने  उनले सोच बनाएका  छन् । अमितजस्तै समस्या भएका हल्दिवारी गाउँपालिकाका  ६ जनाले निःशुल्क ह्विलचियर पाएका छन् ।   ह्विलचियर पाउने अन्यमा  नेत्रबहादुर  राउत ,  विजय मुर्मू , रोमन नेम्बाङ र धूमबहादुर  फुयाँल र  राजु तामाङ रहेका छन् ।  आफ्ना छोराले ह्विलचियर पाएपछि अमितकी आमा  समरी महतोले पनि खुशी व्यक्त गरिन् ।  अमित उनका एक मात्र छोरा हुन् । सँगै पढ्ने अमितकी बहिनीले  ह्विलचियरमा विद्यालय ल्याउन  पुर्‍याउन सहयोग गर्ने गरेको  आमा  समरीले बताइन् । 

आफ्ना पालिकाका ६ जनाले ह्विलचियर  पाएपछि हल्दिवारी गाउँपालिकाका अध्यक्ष रवीन्द्रप्रसाद लिङ्देनले  आयोजक संस्थालाई  धन्यवाद दिए । उनले राज्य एक्लैले सबै काम गर्न नसक्ने भन्दै रोटरी क्लबसँगको साझेदारीलाई निरन्तरता दिने प्रतिबद्धता जनाए ।  त्यस्तै प्रमुख प्रशासकीय अधिकृत  मानबहादुर बन( महेन्द्र) ले   रोटरी क्लबले गरेको सहयोगको उच्च मूल्याङ्कन  गर्दै  आगामी दिनमा  सहकार्य रहने जनाए ।  हल्दिवारीमा अपाङ्गता भएका व्यक्तिहरूको सङ्ख्या ४३५ रहेको छ । कार्यक्रमको औचित्यमाथि प्रकाश पार्दै रोटरी क्लब अफ डिल्लीबजारका भाइस प्रेसिडेन्ट  युवराज रोक्काले  यस वर्ष  आफूहरूको संस्थाले ३३० थान ह्विलचियर वितरण गरेको जानकारी दिए । त्यसमध्ये २४ वटा झापामा वितरण गरिएको छ । 

हल्दिवारी गाउँपालिकामा ६ , झापा गाउँपालिकामा  १३ र कनकाई नगरपालिकामा  ५ वटा ह्विलचियर वितरण गरिएको उनले बताए । अर्को वर्ष एक हजार वटा  ह्विलचियर वितरण गर्ने योजना रहेको उनले सुनाए । भाइस प्रेसिडेन्ट   पार्वता खरेल विमलीले  संयोजन गरेको सो कार्यक्रममा  रोटरी क्लब अफ बिर्तामोडका अध्यक्ष सुरेशकुमार अग्रवाल भद्रपुरे ,  सर्भिस प्रोजेक्ट  डाइरेक्टर  सुरेश  बंशल , रोटरी क्लब अफ डिल्लीबजारका  अध्यक्ष प्रेम ओली , रोटरी क्लब अफ बिर्तामोडका पूर्व अध्यक्षहरू ,  हल्दिवारी १ का वडाध्यक्ष देवीबहादुर थापा , २ का वडाध्यक्ष शुकलाल राजवंशीलगायतको उपस्थिति रहेको थियो । 

त्यस्तै झापा गाउँपालिकाका १३ जनाले  ह्विलचियर पाएका छन् । टीका मर्डी ,  फिरोज मिया ,  आसीन कोच ,  पार्वती गणेश ,  मोहम्मद  सैफुल शेख ,  विद्यासिंह बस्नेत , आम्बरा खातुन ,  अप्सना खातुन ,  तस्लिम  मुद्धिन , अभय गणेश , कविरजंग राजवंशी ,  खुशेदा  खातुन र सोमलाल हस्दाले ह्विलचियर पाएका हुन् ।  झापा गाउँपालिकाका कार्यवाहक अध्यक्ष अन्जुदेवी  थपलियाको अध्यक्षतामा भएको कार्यक्रममा रोटरी क्लब अफ बिर्तामोडका अध्यक्ष सुरेशकुमार अग्रवाल भद्रपुरे ,  सर्भिस प्रोजेक्ट  डाइरेक्टर  सुरेश  बंशल , उपाध्यक्ष पार्वता  खरेल बिमली , रोटरी क्लब अफ डिल्लीबजारका  अध्यक्ष प्रेम ओली, उपाध्यक्ष  युवराज रोक्कालगायतको उपस्थिति रहेको थियो ।  सो कार्यक्रमको संयोजन   शैलेन्द्र कुरुम्वाङले गरेका थिए । 

त्यस्तै रोटरी क्लब अफ डिल्लीबजारको सहयोगमा रोटरी क्लब अफ  सुरुङ्गाले पाँच जनालाई ह्विलचियर वितरण गरेको छ ।  विनिता दर्जी परियार ,  देवेन्द्र  बस्नेत,  रोशन दाहाल ,  सनिल न्यौपाने  र सिलादेवी  भट्टराईलाई  ह्विलचियर वितरण गरिएको हो ।    यसैबीच  रोटरी  क्लब अफ डिल्लीबजार र रोटरी क्लब अफ बिर्तामोडद्वारा  झापा गाउँपालिकाको त्रिभुवन आधारभूत विद्यालयमा बालमैत्री  कक्षाका लागि सहयोग गरिएको छ ।    त्यस विद्यालयमा कार्पेट , भित्ते चित्र , फाइवरको पाँचवटा  राउन्ड टेबल सहयोग गरिएको रोटरी क्लब अफ बिर्तामोडका अध्यक्ष सुरेशकुमार अग्रवाल भद्रपुरेले जानकारी दिएका छन् ।