राष्ट्र, राष्ट्रियता, धर्म–संस्कृति र नागरिक बचाउ अभियानका संयोजक दुर्गा प्रसाईँ पक्राउ परेका छन्। जिल्ला प्रहरी परिसर काठमाडौँको टोलीले  सोमबार मध्यरातमा भक्तपुरस्थित निवासबाटै मेडिकल व्यवसायी प्रसाईँ पक्राउ गरेका हुन्। 

प्रसाईँका एक निकटस्थ सहयोगीका अनुसार सुतिसकेका प्रसाईँलाई पक्राउ गर्न ठूलो सङ्ख्यामा प्रहरी टोली मध्यरातमा निवासमा पुगेको थियो । 

मेडिकल व्यवसायी प्रसाईँको निवासबाट उनलाई निकाल्दै गरिएको भिडियोसमेत सार्वजनिक भएको छ । भिडियोमा प्रसाईँले आफू गाडी चढ्दै गरेको खिच्न भनिरहेका छन्। 

उनले सोमबार दिउँसो पत्रकार सम्मेलन गरेका थिए। पत्रकार सम्मेलनपश्चात् प्रधानमन्त्री सुशीला कार्कीमाथि प्रश्न उठाउँदै प्रसाईँले आफ्नो फेसबुकमा भिडियो समेत सार्वजनिक गरेका थिए।

प्रसाईँले मंसिर ७ गतेदेखि आन्दोलनको घोषणा गरेका छन्। आन्दोलनको तयारीमा रहेका उनी राति पक्राउ परेका हुन् । यस अगाडि गृह मन्त्रालयमा प्रसाईँका तर्फबाट २६ बुँदे माग पत्र पेस भएको थियो। माग पूरा नभए शान्तिपूर्ण आन्दोलन हुने प्रतिबद्धता जनाएको थियो ।

गृहमन्त्री ओमप्रकाश अर्यालले आइतबार बोलाएको सुरक्षा समिति बैठकमै पनि प्रसाईँलाई नियन्त्रणमा लिनेबारे छलफल भएको स्रोतको भनाई छ।