इरान र अमेरिकाबिच जारी तनावका बिच अमेरिकी सेनाले इरानभित्र नयाँ हवाई आक्रमण गरेको छ। अमेरिकी सेनाले रणनीतिक रूपमा महत्त्वपूर्ण मानिने बन्दरगाह सहर 'बन्दर अब्बास' स्थित एक सैन्य स्थललाई निशाना बनाएर हमला गरेको हो।

तीन दिनभित्र अमेरिकाले इरानमाथि गरेको यो दोस्रो आक्रमण हो। यस नयाँ द्वन्द्वले दुई देशबिच भर्खरै भएको कमजोर युद्धविरामलाई फेरि संकटमा पारेको छ।

अमेरिकी सेन्ट्रल कमान्ड (सेन्कम) का अनुसार हर्मुज जलडमरू आसपास खतरा पैदा गरिरहेका इरानका चारवटा 'वान-वे' आत्मघाती ड्रोनहरूलाई अमेरिकी फौजले खसालेका छन्। बन्दर अब्बासको सैन्य साइटबाट पाँचौँ ड्रोन प्रक्षेपण गर्नै लाग्दा अमेरिकाले त्यहाँ बमबारी गरेको सेन्कमले जनाएको छ। उता, इरानी सञ्चारमाध्यमहरूले पनि बन्दर अब्बास सहरको पूर्वी क्षेत्रमा ठुला विस्फोटका आवाजहरू सुनिएको पुष्टि गरेका छन्।

अमेरिकाले यो आक्रमण विशुद्ध 'आत्मरक्षा' का लागि र आफ्ना सैनिकहरूको सुरक्षाका लागि गरिएको दाबी गरेको छ। यसअघि गत सोमबार पनि अमेरिकाले दक्षिणी इरानमा मिसाइल साइट र बारुदी सुरुङ बिछ्याउन खोज्ने इरानी डुङ्गाहरूमाथि हमला गरेको थियो।

इरानले अमेरिकी आक्रमणको कडा निन्दा गर्दै यसलाई युद्धविरामको गम्भीर उल्लङ्घन भनेको छ। इरानी सरकारले अमेरिकाको यस शत्रुतापूर्ण कार्यको ढिलो-चाँडो कडा जवाफ दिने चेतावनी दिएको छ। इरानको इस्लामिक रिभोलुसनरी गार्ड कर्प्स (IRGC) ले आफूहरूले पनि एक अमेरिकी ड्रोन खसालेको र इरानी हवाई क्षेत्रमा प्रवेश गर्ने फाइटर जेटमाथि गोली प्रहार गरेको दाबी गरेको छ।

विगत तीन महिनादेखि चलिरहेको यो युद्धका कारण हर्मुज जलडमरू क्षेत्रमा यातायात ठप्प प्रायः भएको छ। यस क्षेत्रमा हजारौँ व्यावसायिक ट्याङ्कर जहाजहरू अलपत्र परेका छन्, जसका कारण विश्वव्यापी रूपमा ऊर्जा र इन्धनको मूल्य तीव्र रूपमा बढेको छ।

यसैबिच, अमेरिकी राष्ट्रपति डोनाल्ड ट्रम्पले इरानसँग भइरहेको शान्ति वार्ताप्रति आफू अझै सन्तुष्ट नभएको स्पष्ट पारेका छन्। बुधबार आयोजित क्याबिनेट बैठकमा बोल्दै राष्ट्रपति ट्रम्पले इरान 'अन्तिम श्वासमा वार्ता गरिरहेको' टिप्पणी गरे।

इरानी सरकारी टेलिभिजनले अमेरिकी सेना फिर्ता हुने लगायतका बुँदा समेटिएको ड्राफ्ट सम्झौता सार्वजनिक गरे पनि ह्वाइट हाउसले त्यसलाई 'पूर्ण रूपमा बनावटी' भन्दै खारेज गरिदिएको छ। ट्रम्पले इरान आफ्ना सर्तहरूमा सहमत नभए फेरि ठुलो स्तरको बमबारी अभियान सुरु गर्ने धम्की दिँदै भनेका छन्, 'कि त उनीहरूले सम्झौता गर्नुपर्छ, नत्र हामी यो काम आफैँ सिध्याइदिन्छौँ।'