रोल्पामा खहरे खोलाले बगाउँदा दुई जना  विद्यार्थीको मृत्यु भएको छ। जिल्ला प्रहरी कार्यालय रोल्पाका अनुसार गंगादेव गाउँपालिका–६ रातामाटाका ७ वर्षीय गोपाल खड्का र सोही स्थानका ६ वर्षीय समीर केसीको ज्यान गएको हो। बुधवार साँझ करिब ५ः३० बजे विद्यालयबाट घर फर्कने क्रममा स्थानीय रातामाटा गाउँस्थित खहरे खोलाले उनीहरूलाई बगाएको प्रहरीले जनाएको छ।

घटना लगत्तै स्थानीयवासी र प्रहरीको सहयोगमा खोजी कार्य सञ्चालन गरिएको थियो। घटनास्थलमा प्रहरी टोली पुगिसकेको र घटनाबारे थप अनुसन्धान भइरहेको जिल्ला प्रहरी कार्यालय रोल्पाले जनाएको छ। वर्षायाम सुरु भएसँगै पहाडी जिल्लाहरूमा खोलानाला तथा खहरेमा पानीको बहाव बढ्न थालेकाले स्थानीय प्रशासनले विशेष सतर्कता अपनाउन आग्रह गरेको छ।