भारतको पश्चिम बंगालस्थित मुर्शिदाबाद जिल्लामा अत्यन्तै दुःखद घटना घटेको छ । शुक्रबार बिहान रेलवे क्रसिङ पार गर्ने क्रममा एउटा स्कुल भ्यानलाई यात्रुवाहक रेल (ट्रेन) ले ठक्कर दिँदा भ्यानमा सवार कम्तीमा दुई जना स्कुले बालबालिकाको घटनास्थलमै मृत्यु भएको छ । साथै एक जना अन्य व्यक्तिको पनि मृत्यु भएको जानकारी प्राप्त भएको छ । पूर्वी रेलवेका एक अधिकारीले घटनाको पुष्टि गरेका छन् ।

रेलवे अधिकारीका अनुसार दुर्घटना शुक्रबार बिहान करिब ७ बजे भएको हो । हावडा डिभिजनअन्तर्गत पूर्वी रेलवेको ‘कर्ण सुवर्ण’ रेलवे स्टेशन नजिक रहेको लेभल क्रसिङ गेटमा यो दुर्घटना भएको हो । प्रारम्भिक अनुसन्धानअनुसार बालबालिका स्कुल जाँदै गर्दा यो भयावह दुर्घटना भएको हो ।
दुर्घटनाको समयमा रेलवे क्रसिङको गेट खुला रहेको बताइएको छ । बालबालिका बोकेको स्कुल भ्यान रेलको पटरी पार गर्न लाग्दा त्यही समयमा तीव्र गतिमा आएको ट्रेनले भ्यानलाई ठक्कर दिएको थियो ।

भयानक भिडियो सार्वजनिक
दुर्घटनामा स्कुल भ्यान पूर्ण रूपमा क्षति भएको छ । घटनास्थलबाट सार्वजनिक भएको भिडियोले दुर्घटना कति भयावह थियो भन्ने देखाएको छ । भिडियोमा भ्यानको अवस्था निकै दर्दनाक देखिन्छ भने रेलवे ट्रयाक नजिक ठूलो संख्यामा स्थानीय मानिसहरूको भीड पनि देख्न सकिन्छ ।

घाइतेको उपचार जारी
घटनाको जानकारी पाएलगत्तै रेलवे प्रहरी, स्थानीय प्रशासन र उद्धार टोली घटनास्थल पुगेका थिए । घाइतेहरूलाई तत्काल नजिकैको अस्पताल लगिएको छ, जहाँ केहीको अवस्था गम्भीर रहेको बताइएको छ । मृतकको संख्या अझै बढ्न सक्ने आशंका गरिएको छ । सबै घाइतेलाई उपचारका लागि मुर्शिदाबाद मेडिकल कलेज लगिएको छ ।

प्रत्यक्षदर्शीहरूले रेलवे क्रसिङका गेटम्यान (गेट बन्द गर्ने कर्मचारी) मादक पदार्थ सेवन गरेको अवस्थामा रहेको र त्यसै कारण समयमै गेट बन्द नगरिएको आरोप लगाएका छन् । उनीहरूका अनुसार यही लापरवाहीका कारण ठूलो दुर्घटना भएको हो । हाल ड्युटीमा लापरवाही गरेको आरोपमा गेटम्यान र उनका सुपरभाइजरलाई निलम्बन गरिएको छ ।

पूर्वी रेलवेका अधिकारीले दुर्घटनाको कारण पत्ता लगाउन १० सदस्यीय विशेष टोली घटनास्थलतर्फ पठाइएको जानकारी दिएका छन् । दुर्घटनापछि उक्त रुटमा रेल सेवा प्रभावित भएको छ । अधिकारीका अनुसार हावडा डिभिजनअन्तर्गत अजिमगञ्ज–कटवा रेल खण्डमा रेल सञ्चालन प्रभावित भएको छ ।