केन्याको साम्बुरु काउन्टीमा बुधबार भएको एक हेलिकप्टर दुर्घटनामा इक्वेडरका गुप्तचर प्रमुख मिसेल सेन्सी कोन्टोजी र उनकी पत्नी स्टेफनी होलिहानसहित सात जनाको मृत्यु भएको छ। दुर्घटनामा ज्यान गुमाउने अन्य पाँच जना अमेरिकी नागरिक रहेको अमेरिकी विदेश मन्त्रालयले पुष्टि गरेको छ।

केन्या नागरिक उड्डयन प्राधिकरणका अनुसार युरोकप्टर ईसी–१३० बी४ मोडलको उक्त हेलिकप्टरमा एक पाइलट र ६ जना यात्रु सवार थिए। बिहान ९:१३ बजे लुइसाबास्थित संरक्षित वन्यजन्तु क्षेत्रबाट इवासो न्याइरो नदीतर्फ उडान भरिरहेको अवस्थामा हेलिकप्टर माउन्ट ओलोलोक्वे क्षेत्रमा दुर्घटनाग्रस्त भएको थियो। दुर्घटनामा सवार कसैको पनि जीवित उद्धार हुन सकेन।

इक्वेडरको राष्ट्रिय गुप्तचर केन्द्रका प्रमुख कोन्टोजी आफ्नी पत्नी र साथीहरूसँग निजी भ्रमणका क्रममा केन्या पुगेका थिए। ज्यान गुमाउने अन्य अमेरिकी नागरिकहरूमा अमेरिकाका प्रख्यात टेलिभिजन कार्यकारी जोसे सुआरेजसमेत रहेको बताइएको छ।

दुर्घटनाको वास्तविक कारण र समग्र परिस्थिति पत्ता लगाउन केन्याको यातायात मन्त्रालय तथा वायुयान दुर्घटना अनुसन्धान विभागले सूक्ष्म छानबिन सुरु गरेका छन्। छानबिन समितिका अनुसार खराब मौसम वा प्राविधिक खराबी के कारण दुर्घटना भयो भन्नेबारे विस्तृत अध्ययन भइरहेको छ।