वर्षासँगै आएको बाढीपहिरोको कारण आज पनि देशका विभिन्न राजमार्ग अरुद्ध भएका छन्। रसुवाको भोटेकोसी नदीमा आएको बाढीको कारण यही भदौ १० गतेदेखि नै पृथ्वी राजमार्गसहित रसुवा, नुवाकोट र धादिङका विभिन्न राजमार्ग अवरुद्ध छन्।

पहिरोले अवरुद्ध भएको पृथ्वी राजमार्गमा आज पनि पूर्णरूपमा गाडी चल्न सकेको छैन। धादिङको बेनीघाट रोराङ गाउँपालिका– ७ स्थित कृष्णभिर हुँदै आज पनि गाडी चल्न सकेको छैन। त्यसैगरी बेनीघाट रोराङ गाउँपालिका– १० स्थित ज्वाङ खोला र धादिङकै गजुरी गाउँपालिका– २ चालिसेमा आज एकतर्फी मात्रै गाडी चल्ने अवस्था रहेको प्रहरीले जनाएको छ।

त्यसैगरी काठमाडौँको चन्द्रागिरि नगरपालिका– २ चिसापानीमा पहिरो जाँदा आज पनि धादिङ–काठमाडौँ सडकमा एकतर्फी मात्रै गाडी चलेका छन्। त्यसैगरी आज मुगुमा मुगु–गमगढी सडक, रोल्पामा सहिद राजमार्ग, सुर्खेतमा कर्णाली राजमार्ग र दैलेखमा पनि कर्णाली राजमार्ग आज अवरुद्ध छ।

त्यसैगरी बीपी राजमार्गको खुर्कोट नेपालथोक सडक खण्डमा रातको समयमा मालबाहक र दिनमा यात्रुवाहक सवारी साधन सञ्चालन हुनेगरी पालो मिलाइएको प्रहरीले जनाएको छ।