साउदी अरबको अत्यन्त महत्वपूर्ण इस्ट–वेस्ट तेल पाइपलाइनमा इराकबाट प्रहार गरिएका ड्रोनले आक्रमण गरेपछि मध्यपूर्वको ऊर्जा आपूर्ति फेरि जोखिममा परेको छ। आक्रमणपछि साउदी अरबले सुरक्षा सावधानी अपनाउँदै उक्त रणनीतिक पाइपलाइन अस्थायी रूपमा बन्द गरेको छ। घटनाले विश्व बजारमा कच्चा तेलको आपूर्ति प्रभावित हुनसक्ने र त्यसको प्रत्यक्ष असर तेलको मूल्यमा पर्नसक्ने चिन्ता बढाएको छ।

साउदी विदेश मन्त्रालयका अनुसार रियाद र मदिना क्षेत्रमा रहेको इस्ट–वेस्ट पाइपलाइनलाई इराकबाट आएका कैयौँ ड्रोनले निशाना बनाएका थिए। आक्रमणका क्रममा केही मानिस घाइते भएका छन् भने पाइपलाइन तथा त्यससँग सम्बन्धित संरचनामा क्षति पुगेको साउदी पक्षले जनाएको छ। क्षतिको मर्मत तथा सुरक्षा परीक्षण भइरहेको बताइएको छ।

साउदी ऊर्जा मन्त्रालयले आक्रमणपछि पाइपलाइन सञ्चालन अस्थायी रूपमा रोकिएको जनाएको छ। मन्त्रालयका अनुसार आपत्कालीन तथा प्राविधिक टोली घटनास्थलमा परिचालन गरी पाइपलाइनको सुरक्षा अवस्था मूल्यांकन गरिएको छ। पाइपलाइन पुनः कहिलेदेखि सञ्चालनमा आउने भन्नेबारे भने तत्काल स्पष्ट समयसीमा दिइएको छैन।