कक्रोज जनता पार्टी (सीजेपी)का संस्थापक अभिजित दिपके र नेहा बोरासहित १५० जना पक्राउ परेका छन्।  हिन्दुस्थान टाइम्सका अनुसार, सिजेपी प्रदर्शनका क्रममा शुक्रबार प्रहरीले उनीहरुलाई दिल्लीको कनट प्लेस, जनपथ रोड र मन्डी हाउस क्षेत्रबाट पक्राउ गरेको हो। दिपकेलाई उनको संगठनको ‘लहरा दो तिरंगा’ मार्चका लागि कनट प्लेस जाँदै गर्दा पक्राउ गरिएको थियो भने, नेहा बोरालाई मार्च सुरु गरेको केही समयपछि मन्डी हाउस नजिकैबाट नियन्त्रणमा लिइएको हो।

यसअघि, दिल्ली प्रहरीले अभिजित दिपकेलाई एक सूचना जारी गर्दै कनट प्लेसमा प्रदर्शनका लागि तोकिएको ठाउँ नभएको जानकारी गराउँदै मार्च नगर्न आग्रह गरेको थियो। अक्टोबर १३ मा जन्तर मन्तरमा प्रवेश गरेपछि सिजेपीका नेताहरू सौरभ दास र आशुतोष रांकालाई न्यायिक हिरासतमा पठाइएको घटनालगत्तै यो प्रदर्शन भएको हो। जन्तर मन्तरलाई प्रदर्शन स्थलको सूचीबाट हटाइसकिएको छ।

दिल्ली प्रहरीले लुटियन्स क्षेत्र र यसको वरपर ६,००० भन्दा बढी सुरक्षाकर्मी परिचालन गर्ने योजना बनाएको छ। यसका साथै, अन्य जिल्लाहरूबाट थप ५,००० सुरक्षाकर्मीहरूलाई पनि तयारी अवस्थामा राखिएको छ।  राजीव चोक, कनट प्लेसका बजारहरू, सेन्ट्रल पार्क, नजिकैका मेट्रो स्टेशनहरू, जन्तर मन्तर र पालिका बजार वरपर सुरक्षा व्यवस्था कडा पारिनेछ।