मेचीनगर । झापाको मेचीनगर -४ बाहुनडाँगी स्थित सरस्वती माविको खेल मैदानमा जारी इण्डो-नेपाल  टी-ट्वान्टी क्रिकेट प्रतियोगिता अन्तर्गत आज भएको  खेलमा बिर्तामोड झापा क्रिकेट क्लबलाई २५ रनले पराजित गर्दै पेनोरिस -११ सेमिफाइनल प्रवेश गरेको छ। 

टस हारेर पहिलो ब्याटिङ गरेको पेनोरिसले १८.५ ओभरमा सबै विकेट गुमाउँदै मात्रै १४२ रन बनाएको थियो ।  पेनोरिसका लागि सुनिल ठाकुरले सर्वाधिक ५६ रन बनाए । उनले ३५ बलमा ५६ रन बनाएका हुन्।  त्यस्तै सिन्टु देवले १९ रन, करनजित रोयले १७ रन तथा बोनम अलि खान र अनुज रोयले समान १२ रन बनाए।

बलिङतर्फ बिर्तामोडका लागि ज्ञानु श्रेष्ठले सर्वाधिक ५ विकेट लिए। उनले कसिलो बलिङ गर्दै ४ ओभरमा २५ रन दिएर ५ विकेट लिएका हुन्। त्यस्तै बिर्तामोडका लागि विक्रम यादवले २ तथा दिपु चौधरी , समीर चौधरी र अर्पन कोइरालाले समान १/१ विकेट हात पारे । 

१४३ रनको विजयी लक्ष्य पछ्याउने क्रममा बिर्तामोडले १७.३ ओभरमा सबै विकेट गुमाउँदै ११७ रन मात्रै बनाउन सक्यो । बिर्तामोडले २५ रनको हार बेहोर्न बाध्य भयो । बिर्तामोडका लागि भुपेस बजगाईँले सर्वाधिक ३३ रन बनाए। त्यस्तै बिर्तामोडका लागि एलिस मण्डलले १९, समीर चौधरीले १७, ज्ञानु श्रेष्ठले १२ तथा सिवन्स बजगाईँले ११ रन  बनाएका थिए। अन्य ब्याट्सम्यानले दोहोरो अंकमा रन बनाउन नसक्दा बिर्तामोडले हार बेहोर्न पुग्यो । 

यता बलिङतर्फ पेनोरिसका लागि बोनाम अलि खानले सर्वाधिक ४ विकेट लिए भने राकेश बर्माले ३ तथा करणजित रोय, अनुज रोय र देवाशिस मिथेले समान १/१ विकेट लिएका थिए।  प्रतियोगिताको म्यान अफ द म्याच पेनोरिसका बोनाम अलि खान घोषित हुँदै नगद १ हजार र मायाको चिनो प्राप्त गरे। उनले बलिङतर्फ ४ विकेट लिएका थिए भने ब्याटिङतर्फ १२ रन प्रहार गरेका थिए।  भोलिको खेल थण्डर -११ र दमक क्रिकेट क्लबबिच बिहान १० बजेशुरु हुनेछ । 

फागुन २१ गतेबाट शुरु भएको प्रतियोगिताको फाइनल खेल चैत ४ गते सम्पन्न हुनेछ । प्रतियोगिताको विजेता टिमले नगद रु ५० हजार सहित ट्रफी, मेडल र प्रमाणपत्र पाउनेछ भने उपविजेता टिमले नगद रु ३० हजार सहित ट्रफी, मेडल र प्रमाणपत्र प्राप्त गर्नेछ।